CS4

Það þarf lítið til að gleðja mig. Þó svo að ný útgáfa af Adobe forritunum teljist ekkert smámál þá er útgáfa CS4 pakkans ekki það sem kætir mig heldur akkúrat ein lítil breyting sem er búið að bæta við Illustrator (og vonandi öll forritin) – Flipar.

Nú hváir alþjóð og spyr: Hvað meinarðu drengur?

Flipar! Þið vitið, eins og í firefox og öllum browserum sem stálu þessari snilld frá þeim. Upp á enskuna heitir það “tabs” eða “tabbed browsing” (prófið það… ýtið núna á Ctrl og T saman) og nú verður hægt að fletta á þennan þægilega hátt í Adobe Illustrator CS4 og ég bókstaflega slefa af eftirvæntingu. Ég veit… ég er einföld sál en allt sem hjálpar vinnuflæðinu í þessum blessuðu myndvinnsluforritum lít ég á sem persónulega gjöf til mín því ég get verið pirraði gaurinn þegar ég er fyrir framan tölvuna.

Lesið þessa skemmtilegu grein um málið á gomediazine.com og njótið þess að vera nördar!

Hægur andvari, undanfari stormsins

Jæja, best ég skrifi nú eitthvað svo ég falli ekki alveg á þessum hluta námsins. Málið er bara að það hefur verið lítið að gera hjá Dojopan Productions undanfarið. Og ekki er það út af verkefnaleysi heldur er skólinn það heimtufrekur á tímann þessa dagana að ég veit varla hvert á að snúa mér. En það er að sjálfsögðu bara nöldur. Hættu því nú, Halldór.

Þó svo að það sé nú ekki beint á vegum Dojopan Productions þá er alla vega ein teiknimynd búin að líta dagsins ljós hjá mér í vetur. Það er myndin „Hið Helga Buff“ sem var unnin í samvinnu við Jens Júlíusson sem verkefni fyrir skólann og get ég þá alla vega sagt að eitt stykki hreyfimynd sé komin í vetur. Mér skilst að önnur slík eigi eftir að líta dagsins ljós í hreyfimyndakúrsunum. Hún mun vera með dialogi þótt það drepi mig.

Þriðja teiknimyndin mun svo eflaust fæðast með sumrinu því Tímaflakks félagarnir höfðu mjög gaman af Buffinu og vilja fá mig í framleiðslu á einni slíkri sem gæti þá mögulega orðið pilot fyrir áframhaldandi seríu. Ef ég þekki þá félaga rétt þá verður hún eflaust mjög súr. Mockumentary myndin þeirra hefur setið á hakanum í vetur vegna anna hjá báðum aðilum en vonandi gefst tími til að klára hana sem fyrst.

Á meðan hef ég verið að krota aðeins í handritið mitt sem ég skrifaði í fyrra og reyna að gera það aðeins meira spennandi og helst fyndnara, þar sem jú þetta á að vera gamansöm mynd. Ég er loksins kominn með almennilega útgáfu af Final Draft þannig ég ætti að geta teygt mig út fyrir 15 blaðsíðna rammann sem gamla prufuútgáfan sem ég var með innihélt.

En meira er það ekki í dag. Lifið heil.

Upptökur, veikindi og innkaup

Ég leit við hjá þeim Tímaflakks mönnum fyrir rúmlega viku og tókum við upp u.þ.b. 18 mínútur af efni á meðan þeir tóku upp útvarpsleikrit vikunnar. Fyrirhugað var að halda upptökum á nokkurs konar mockumentary mynd um upptökur þáttarins en vegna veikinda Eyvindar og Bjarna varð einhver töf á því. Veikindin hafa ílengst þannig að óljóst hvenær verður hægt að halda verkinu áfram.

Í framhaldi af þessu hefur Eyvindur lýst yfir áhuga sínum á að fá mig til að taka upp aðra stuttmynd með honum og Þórhalli, óháða þættinum, og einnig að hann sé til í að taka að sér hlutverk sound designer í þeirri mynd og fleiri verkefnum sem framtíðin kann að bera með sér.

Ég hef svo ákveðið að fara í tækjakaup og fá mér alhliða upptökugræjur og synthahljómborð til að auðvelta mér tónsmíðar fyrir bæði kvikmyndaverk mín og svo hljómplötu sem ég er með í burðarliðnum. Til að fjármagna þessi innkaup hef ég tekið þá erfiðu ákvörðun að selja gítarmagnarastæðu mína sem hefur þjónað mér vel á sviði og æfingum með hljómsveitinni Pan en þar sem hún lagði niður störf í síðustu viku þá sé ég meiri ástæðu til að bæta tækjakostinn í litla amateur stúdíóinu heldur en að láta þetta tryllitæki rykfalla út í bæ.

Nóg í dag.

Aukaverkefni

Á mánudag kemur að fyrsta verkefni mínu síðan ég hóf að blogga um stuttmyndagerð mína. Þetta er lítið aukaverkefni sem ég mér var boðið að gera með þeim Eyvindi Karlssyni og Þórhalli Þórhallssyni, en þeir sjá um þáttinn Tímaflakk á Rás 2 og verð ég á myndavélinni í þetta sinn en enn á eftir að semja um klippivinnu. Um er að ræða stuttmynd með ótilgreindu handriti (enda hef ég ekki fengið að sjá það… ef það er þá yfirhöfuð til) og eru upptökur planaðar á mánudaginn kemur. Mér skilst að þetta eigi eitthvað að tengjast þætti þeirra drengja að einhverju leyti án þess að vita það neitt frekar. Þið megið vænta fullrar skýrslu á mánudagskvöld.

Ævintýrið byrjar

Jæja, þá er ég loksins kominn í samband við umheiminn aftur sem nýjasti viðskiptavinur mamma.is og svartnættið sem umlukti tölvuheim minn um helgina hefur vikið fyrir tengingu sem við fyrstu sýn er mun stöðugari en sú sem ég hef upplifað undanfarnar vikur. Ég bið nöldurseggina sem lögðu sitt innlegg inn í umræðu síðastu færslu afsökunar á því að hafa ekki komist í þetta fyrr en svona er lífið. Ef þú biður apa um að dansa þá gæti hann bara kastað skít í þig.

Dojopan Production er komið af stað, kannski ekki með látum en frumdrögin liggja fyrir. Handritshöfundur verkefnisins mun vera háæruverðugur Guðbjartur Karl Reynisson Vídalín og höfum við lagt fram grunninn að fyrstu hugmyndinni sem komið hefur fram. Vegna starfa háæruverðugs Guðbjarts hjá Bónusvideoleigu Hafnarfjarðar þá kom upp sú hugmynd að staðsetja söguna þar og yrðu sögupersónur þá starfsmenn leigunnar. Nákvæmur söguþráður liggur ekki fyrir en mikið hefur verið rætt um eðli persónanna og með hvaða hætti skal þróa skrifin en líkast til verður reynt við húmorinn í þetta sinn. Ein helsta áskorunin verður að fjarlægjast þá gildru að búa til eftirhermu af Clerks úr smiðju meistara samtalanna Kevin Smith þó svo að ljóst sé að sú mynd sé áhrifavaldur á okkur báða og verður líkast til í bakgrunni þarna einhvers staðar.

Einnig er til staðar handrit sem ég lagði til sem verkefni í hreyfimyndagerðarkúrs Margmiðlunarskólans fyrir jól þó svo að það hafi ekki enn verið dregið upp á teikniborðið. Víst er að vinna þurfi í því en tel ég það vera góðan efnivið í gamansama stuttmynd sem auðvelt er að kvikmynda með smá fyrirhöfn og litlum kostnaði.

Sérlegur aðstoðarmaður verkefnisins er Björgvin Benediktsson þó svo að hlutverk hans sé enn óskilgreint.

Dojopan Poductions(?)

Þá er nýtt blogg komið á laggirnar og mun ég blogga hér einu sinni í viku sem hluti af námi mínu hjá margmiðlunarskólanum. Umfjöllunarefni mitt stuttmyndaverkefni sem ég ætla mér að vinna að á næstunni og markmiðið er að ná að gera alla vega eina stuttmynd og helst nokkrar á þessari önn. Verður þetta blogg hluti af hvatningarkerfi fyrir sjálfan mig þar sem ég mun þurfa að sýna fram á framvindu verkefnisins og mun það ekki líta vel út ef hver vika er uppfull af afsökunum og slóðaskap. Eins og er þá er ég einn í þessu en ef einhver hefur áhuga á að taka þátt í óskapnaðnum á hvaða hátt sem það myndi vera þá er bara málið að vera í bandi.

Meira er það ekki í dag.